Depi 15 pou rive 31 janvye 2025, kanpay « Viv Dessalines » lan ofri gran piblik la yon seri aktivite pou onore memwa Jean-Jacques Dessalines, yon figi santral nan batay pou endepandans Ayiti. Inisyativ sa, ki fèt anba direksyon Collinx Mondésir ak atis BélO, gen pou objektif fè pwomosyon lavi ak kontribisyon istorik papa nasyon an atravè kreyasyon atistik, refleksyon syantifik, ak temwayaj kominotè.
Lansman ofisyèl kanpay la te fèt 15 janvye a, nan yon moman kote peyi a ap fè fas ak yon kriz ekonomik ak ensekirite grav. Daprè òganizatè yo, pwojè sa vize mete ideyal Dessalines yo nan sant deba piblik yo epi ranfòse refleksyon kolektif sou wòl li nan istwa ak nan lavni peyi a.
“Kanpay #VivDessalines se yon mouvman edikatif, reflektif, ak kreyatif ki vize onore memwa Jean-Jacques Dessalines, retabli eritaj li, epi angaje Ayisyen nan yon refleksyon kolektif sou vizyon ak ideyal revolisyonè li pou yon Ayiti rich ak egalitè”, te ekri Collinx Mondésir nan yon piblikasyon sou rezo sosyal X la (Ansyen Twitter).
Kanpay « Viv Dessalines » baze sou twa aspè prensipal: Premyèman, ap gen kreyasyon atistik tankou mizik, pwezi ak atizay vizyèl pou reviv kontribisyon Dessalines nan batay pou libète. Dezyèmman, ap gen kozri syantifik kote tout moun ka patisipe nan refleksyon sou wòl Dessalines nan yon repiblik ki jis ak egalitè. Twazyèmman, ap gen espas kote kominote ayisyen yo ka pataje vizyon yo sou eritaj ewo nasyonal la.
Daprè dokiman ofisyèl yo, kanpay la genyen senk objektif prensipal:
- Mete aksan sou lavi ak vizyon Jean-Jacques Dessalines.
- Angaje sosyete a nan yon refleksyon kolektif pou prezève memwa istorik li.
- Kreye espas kreyatif ak atistik pou ranfòse konsyans sosyal sou kontribisyon li.
- Ankouraje otorite ak popilasyon an pou reflechi sou nesesite pou fè yon antèman senbolik nasyonal pou Dessalines.
- Pwodui kontni edikatif pou enfòme piblik la sou ideyal ak prensip politik li.
Kanpay la ap sèvi tou ak videyo kout, mesaj grafik ak atik pou pataje enfòmasyon ak ranfòse edikasyon sou lavi Dessalines.
Jou k ap 31 janvye 2025 la, kanpay la ap rive nan bout li ak lansman ofisyèl yon mizik espesyal ki rele Lanperè A Mouri, yon kolaborasyon ant Collinx Mondésir ak BélO. Chante sa a fèt pou salye memwa Dessalines epi rekonèt wòl enpòtan li nan libere pèp ayisyen an anba chenn esklavaj.
Kanpay sa vle raple sosyete a sou kontribisyon istorik Dessalines pandan l ap ouvè yon espas pou refleksyon sou ideyal ewo nasyonal sa nan kontèks Ayiti jodi a.
Pa Ravensley Boisrond, redaktè an chèf Chokarella
