Bedjine ak K-Dilak ansanm pi rantab pase lè yo chak travay an solo: se 2 atis yo menm ki revele sa nan yon ti chita pale ak Carel Pedre.
Bedjine ki ap jere melodi, K-Dilak ki nan ekri tèks epi nan miksaj, atis yo pa regrèt ditou yo te fè chwa kreye yon dyo ki eksploze nan Endistri mizikal ayisyen an.
Soti nan ‘’Pouki n te marye’’ pase nan “Fo pwomès’’ jouk rive nan premye albòm yo, Bedjine ak K-Dilak mete fòs ak feblès yo ansanm pou yo rive fòme yon dyo pwodiktif ak rantab.
“Mete tèt nou ansanm pote plis siksè pou nou tou 2 nan zafè popilarite, ni nan zafè lajan”, atis yo deklare nan mikwo animatè kiltirèl Carel Pedre.
Nan ti chita pale sa, Bedjine ak K-Dilak te pwofite pale de teknik yo itilize pou yo travay ansanm ak fè siksè nan travay yo, men sitou sinèji, amoni ak enèji ki degaje nan mitan yo.
“Fòmil siksè nou se koneksyon nou, jan nou antann nou, jan nou yonn konplete lòt, nou respekte fòs ak feblès yonn ak lòt”, mesye dam yo avwe.
Dapre Bedjine, albòm “Misyon akonpli” a se yon angajman yo te pran pou ofri fanatik yo yon pwojè konplè ki ap make pasaj yo nan endistri mizikal ayisyèn nan.
K-Dilak bò kote pa l esplike dyo a te jwenn èd ak atansyon plizyè gwo mizisyen ayisyen sou albòm nan tankou: Keke Belizaire, Fabrice Rouzier, T-Regi, Jeff (Amonik) Chedly Abraham ak plizyè lòt ankò.
Si pou anpil moun, atis ayisyen yo la sèlman pou fè moun danse, K-Dilak ak Bedjine wè chak atis tankou yon “epis ki pote gou diferan nan endistri mizikal ayisyèn nan”.
Chak atis nan HMI la yo pote yon epis anplis, ki vin bay manje ya gou. Bedjine ak K-Dilak pote epis pa yo a pou fè pwdwi nan HMI la pi gou.
Gade tout entèvyou a sou youtube Chokarella nan lyen ki anba a
