Vil Jérémie ak tout Ayiti pran yon kou lendi 4 novanm 2024 la a ; Maurice Léonce, dwayen powèt yo, ansyen espòtif, aktè, dansè ak ansyen pwofesè. Malgre l te gentan gen 103 lane, lanmò pèsonalite sa a ki te trè respekte nan vil site powèt yo rive frape anpil moun nan 4 kwen peyi a. Pou sa l te senbolize, Maurice se yon mapou k pa t dwe janm tonbe. Chokarella ap pataje ak ou 10 bagay ou dwe konnen de gwo gason sa a.
- Léonce Mautice te fèt 10 septanm 1921 nan vil Jérémie. Li te gen 6 timoun. Youn nan yo te mouri nan lane 2021, a 68 an. Anvan l travèse, pitit li yo te gentan ba l 64 pitit pitit.
- Manman l te rele Angèle Etienne. Se te yon pwofesè k te briyan anpil e ki make lavi Maurice. Papa l, se te yon Fransè k te rele Julien Léonce.
- Se te yon powèt ki te damou fou peyi a men k te gen yon lanmou apa pou vil natal li, Jérémie. Se te yon moun ki te fè tout vi l ap nouri plizyè pasyon. Ladan yo, nou ka site football, literati, dans ak ansèyman.
- Maurice fè yon bon pati nan lavi l kòm pwofesè kilti fizik ak literati nan plizyè lekòl nan Jérémie. Akoz de laj li ak sa l reprezante, anpil moun te ba l ti non jwèt « Bibliyotèk vivan » an.
- Nan lane 1964 , li t oblije kouri kite Jeremi pou l pa pèdi lavi l akoz zak sasinay gouvènman Papa Doc la, François Duvalier, t ap poze alepòk. Maurice te kite Ayiti pou l al viv Ozetazini, nan vil New York. Nan vil sa a, li ta pral pase aviwon 32 lane.
- Antanke espòtif, Maurice Léonce te pran anpil prekosyon nan sa l ap konsome epi pratike egzèsis fizik paske l te toujou vle rete an sante. Menm lè l te jèn, li pa t janm bwè alkòl ni fimen. Selon li, sa te jwe yon gwo wòl nan ede l atenn laj li rive a.
- Aprè l te fin marye e divòse ak manman pitit li nan jèn laj li, Maurice Léonce ta pral siprann anpil moun lè l te deside remarye 29 out 2024. Li te gentan gen 103 lane lè sa a. Madanm li, Édith Dorestant te gen 43.
- Youn nan bagay ki te etone anpil moun, se foug, lisidite ak rezonnman Maurice te toujou malgre l te avanse anpil nan laj. Menm a 103 lane, li te konn fè pati yon ekip ki prezante yon emisyon espesyal sou « Radio Lambi », 104.1 FM nan vil Jérémie. Li te toujou pwofite de fenèt sa a pou denonse sa k ap pase nan peyi a epi adrese l ak lajenès pou envite yo pran men yo.
- Léonce Maurice te toujou kwè ke gen yon jou k ap rive kote Ayiti ap jwenn yon dirijan k ap vin retire l nan sa l ye la. Yon moun k ap wè devlopman peyi a anvan tout lòt bagay. Li te kwè sa gen pou fèt menmsi se ta aprè l fin mouri.
- Maurice Léonce te renmen lavi ak lajwa. Li te deklare ke l pa vle gen lapenn ak tristès ni okenn diskou nan fineray li. Li te vle pou sèlman genyen yon flè woz ak 2 boul foutbòl sou sèkèy li.
Redaksyon : Peterson Dorsainvil © Chokarella
